ភ្នំពេញ៖ ក្រសួងធនធានទឹកនិងឧតុនិយមឱ្យដឹងថា កម្ពុជានឹងទទួលរងនូវឥទ្ធិពលសម្ពាធទាប និងខ្យល់មូសុងនីរតីបក់ក្នុងល្បឿនពីមធ្យមទៅច្រើនដែលនឹងអាចបណ្ដាលឱ្យមានភ្លៀងធ្លាក់ទូទាំងប្រទេសពីថ្ងៃទី៦ រហូតដល់ថ្ងៃទី៩ ខែកញ្ញា។

ក្នុងសេចក្ដីជូនដំណឹងពីស្ថានភាពអាកាសធាតុដែលបានព្យាករណ៍សម្រាប់ថ្ងៃទី៧ រហូតដល់ថ្ងៃទី១៣ ខែកញ្ញា ក្រសួងធនធានទឹកនិងឧតុនិយមបានឱ្យដឹងថាជាមួយនឹងស្ថានភាពមានភ្លៀងពីមធ្យមទៅច្រើនលាយឡំជាមួយផ្គរ រន្ទះ និងខ្យល់កន្ត្រាក់ទូទាំងប្រទេស សីតុណ្ហភាពនឹងអាចនៅក្នុងរង្វង់ពី២២ ដល់៣៤អង្សាសេផងដែរ។

ជានេះទៅទៀតដោយយោងលើស្ថានភាពធាតុអាកាសនេះ បណ្ដាខេត្តនៅក្នុងភូមិសាស្ត្រជួរភ្នំទីទំនាប និងជាប់ផ្លូវទឹកអាចនឹងប្រឈមនឹងជំនន់ទឹកភ្លៀងពីថ្ងៃទី៦ដល់ថ្ងៃទី៩ ខែកញ្ញា និងនៅលើផ្ទៃសមុទ្រ មានភ្លៀងខ្យល់និងរលកសមុទ្រខ្ពស់ចាប់ពីថ្ងៃទី៧-៩ ខែកញ្ញាផងដែរ៕